O Patriárcha páuperum, Francísce,
tuis précibus auge tuórum númerum in charitáte Christi
4 Ottobre quarto delle None
dal Missale Romano-Seraphicum
Domenica Diciannovesima dopo la Pentecoste
Solennità del nostro Santo Padre Francesco
Doppio di prima classe con Ottava comune. Paramenti bianchi. Messa «Gaudeámus omnes … Francísci».
Die 4 Octobris
IN SOLLEMNITATE
S. P. N. FRANCISCI
CONFESSORIS, TRIUM ORDINUM FUNDATORIS
Duplex I classis cum Octava communi
Introitus
Gaudeámus omnes in Dómino, diem festum celebrántes sub honóre beáti Francísci : de cujus sollemnitáte gaudent Angeli et colláudant Fílium Dei. Ps. 32, 1. Exsultáte, justi, in Dómino : rectos decet collaudátio. V). Glória Patri.
Oratio
Deus, qui Ecclésiam tuam beáti Patris nostri Francísci méritis fœtu novæ prolis amplíficas : tríbue nobis, ex ejus imitatióne, terréna despícere; et cæléstium donórum semper participatióne gaudére. Per Dóminum.
Et fit Commemoratio Dominicæ :
Oratio
Omnípotens et miséricors Deus, univérsa nobis adversántia propitiátus exclúde : ut mente et córpore páriter expedíti, quæ tua sunt, líberis méntibus exsequámur. Per Dóminum.
Léctio Epístolæ beáti Pauli Apóstoli
ad Gálatas Gal. 6, 14-18
Fratres : Mihi autem absit gloriári nisi in Cruce Dómini nostri Jesu Christi : per quem mihi mundus crucífíxus est, et ego mundo. In Christo enim Jesu neque circumcísio aliquid valet, neque præpútium, sed nova creatúra. Et quicúmque hanc régulam secúti fúerint, pax super illos, et misericórdia, et super Israël Dei. De cétero nemo mihi moléstus sit : ego enim stígmata Dómini Jesu in córpore meo porto. Grátia Dómini nostri Jesu Christi cum spíritu vestro, fratres. Amen.
Graduale. Eccli. 5, 6-7 Quasi stella matutína in médio nébulæ, et quasi luna plena in diébus suis lucet. V). Et quasi sol refúlgens, sic ille effúlsit in templo Dei.
Allelúja, allelúja. V). O Patriárcha páuperum, Francísce, tuis précibus auge tuórum númerum in charitáte Christi : quos cancellátis mánibus cæcútiens et móriens Jacob benedixísti.
SEQUENTIA
Sanctitátis nova signa
Prodiérunt laude digna,
Mira valde et benígna,
In Francísco crédita.
Regulátis novi gregis
Jura dantur novæ legis,
Renovántur jussa Regis
Per Francíscum trádita.
Novus ordo, nova vita
Mundo surgit inaudíta;
Restaurávit lex sancíta
Statum evangélicum.
Legi Christi paris formæ
Reformátur jus confórme;
Tenet ritus datæ normæ
Culmen apostólicum.
Chorda rudis, vestis dura
Cingit, tegit sine cura,
Panis datur in mensúra,
Cálceus abjícitur.
Paupertátem tantum quærit,
De terrénis nihil gerit,
Hic Francíscus cuncta terit,
Lóculus despícitur.
Quærit loca lacrimárum,
Promit voces cor amárum,
Gemit mæstus tempus carum
Pérditum in sáeculo.
Montis antro sequestrátus
Plorat, orat humi strátus,
Tandem mente serenátus
Látitat ergástulo.
Ibi vacat rupe tectus;
Ad divína sursum vectus,
Spernit ima judex rectus,
Eligit cæléstia.
Carnem frenat sub censúra
Transformátam in figúra,
Cibum capit de Scriptúra,
Abigit terréstria.
Tunc ab alto vir hierárcha
Venit ecce Rex monárcha,
Pavet iste Patriárcha
Visióne térritus.
Defert ille signa Christi,
Cicatríces confert isti
Dum mirátur corde tristi
Passiónem tácitus.
Sacrum corpus consignátor,
Manu, pede vulnerátur,
Dextrum latus perforátur,
Cruentátur sánguine.
Verba miscent, arcanórum
Multa clarent futurórum,
Videt Sanctus vim dictórum,
Mýstico spirámine.
Patent statim miri clavi
Foris nigri, intus flavi;
Pungit dolor, pœna gravi
Crúciant acúlei.
Cessat artis armatúra
In membrórum apertúra,
Non impréssit hos natúra,
Non tortúra mállei.
Signis crucis, quæ portásti,
Per quæ mundum triumphásti,
Carnem, hostem superásti,
Inclyta victória.
Nos, Francisce, tueámur,
In advérsis protegámur
Ut mercéde perfruámur
In cælésti glória.
Pater pie, Pater sancte,
Plebs devóta, te juvánte,
Turba fratrum comitánte,
Mereátur práemia.
Fac consórtes Supernórum,
Quos informas vita morum;
Consequátur grex Minórum
Sempitérna gáudia. Amen.
Allelúja.
+ Sequéntia sancti Evangélii secúndum
Matthaéum Matth. 11, 25-30
In illo tempóre : Respóndens Jesus, dixit : Confíteor tibi, Pater, Dómine cæli et terræ, quia abscondísti hæc a sapiéntibus et prudéntibus, et revelásti ea párvulis. Ita, Pater : quóniam sic fuit plácitum ante te. Omnia mihi trádita sunt a Patre meo. Et nemo novit Fílium, nisi Pater : neque Patrem quis novit, nisi Fílius, et cui volúerit Fílius reveláre. Veníte ad me omnes, qui laborátis, et oneráti estis, et ego refíciam vos. Tóllite jugum meum super vos, et díscite a me, quia mitis sum, et húmilis corde : et inveniétis réquiem animábus vestris. Jugum enim meum suáve est, et onus meum leve.
Credo, per totam Octavam.
Offertorium. Philipp. 1, 20-21 Magnificábitur Christus in córpore meo, sive per vitam, sive per mortem. Mihi enim vívere Christus est, et mori lucrum.
Secreta
Múnera tibi, Dómine, dicáta sanctífica : et, intercedénte beáto Patre nostro Francísco, ab omni nos culpárum labe purífica. Per Dóminum.
Pro Dominica
Secreta
Hæc múnera, quaésumus, Dómine, quæ óculis tuæ majestátis offérimus, salutária nobis esse concéde. Per Dóminum.
Præfatio de S. P. N. Francisco, quaæ dicitur per totam Octavam, juxta Rubricas.
PEr ómnia saécula sæculórum.
R). Amen.
V). Dóminus vobíscum.
R). Et cum spíritu tuo.
V). Sursum corda.
R). Habémus ad Dóminum.
V). Grátias agámus Dómino Deo nostro.
R). Dignum et justum est.
Vere dignum et justum est, æquum et salutáre, nos tibi semper, et ubíque grátias ágere : Dómine sancte, Pater omnípotens, ætérne Deus : Qui venerándum Confessórem, fámulum tuum beátum Francíscum, tua, Deus altíssima bonitáte et cleméntia, Sanctórum tuórum méritis et virtútibus sublimásti. Mentemque ipsíus, Sancti Spíritus operatióne, amor ille Seráphicus ardentíssime incéndit intérius, cujúsque Corpus sacris Stigmátibus insignívit extérius, signo crucifíxi Jesu Christi Dómini nostri. Per quem majestátem tuam láudant Angeli, adórant Dominatiónes, tremunt Potestátes. Cæli, cælorúmque Virtútes, ac beáta Séraphim, sócia exsultatióne concélebrant. Cum quibus et nostras voces, ut admítti júbeas, deprecámur, súpplici confessióne dicéntes :
Sanctus, Sanctus, Sanctus, Dóminus Deus Sábaoth. Pleni sunt cæli et terra glória tua. Hosánna in excélsis.
Benedíctus qui venit in nómine Dómini. Hosánna in excélsis.
Communio. Rom. 8, 18 Non sunt condígnæ passiónes hujus témporis ad futúram glóriam, quæ revelábitur in nobis.
Postcommunio
Ecclésiam tuam, quaésumus, Dómine, grátia cæléstis amplíficet : quam beáti Patris nostri Francísci Confessóris tui illumináre voluísti gloriósis méritis, et exémplis. Per Dóminum.
Pro Dominica
Postcommunio
Tua nos, Dómine, medicinális operátio, et a nostris perversitátibus cleménter expédiat, et tuis semper fáciat inhærére mandátis. Per Dóminum.
Et legitur Evangelium de Dominica in fine :
+ Sequéntia sancti Evangélii secúndum
Matthaéum Matth. 22, 1-14
IN illo témpore : Loquebátur Jesus princípibus sacerdótum et pharisaéis in parábolis, dicens : Símile factum est regnum cælórum hómini regi, qui fecit núptias fílio suo. Et misit servos suos vocáre invitátos ad nuptias, et nolébant veníre. Iterum misit álios servos, dicens : Dícite invitátis : Ecce, prándium meum parávi, tauri mei et altília occísa sunt, et ómnia paráta : veníte ad núptias. Illi autem neglexérunt : et abiérunt, álius in villam suam, álius vero ad negotiatiónem suam : réliqui vero tenuérunt servos ejus, et contuméliis afféctos occidérunt. Rex autem cum audísset, iratus est : et, missis exercítibus suis, pérdidit homicídas illos et civitátem illórum succéndit. Tunc ait servis suis : Núptiæ quidem parátæ sunt, sed, qui invitáti erant, non fuérunt digni. Ite ergo ad exitus viárum et, quoscúmque invenéritis, vocáte ad núptias. Et egréssi servi ejus in vias, congregavérunt omnes, quos invenérunt, malos et bonos : et implétæ sunt núptiæ discumbéntium. Intrávit autem rex, ut vidéret discumbéntes, et vidit ibi hóminem non vestítum veste nuptiáli. Et ait illi : Amíce, quómodo huc intrásti non habens vestem nuptiálem? At ille obmútuit. Tunc dixit rex minístris : Ligátis mánibus et pédibus ejus, míttite eum in ténebras exterióres : ibi erit fletus et stridor déntium. Multi enim sunt vocáti, pauci vero elécti.